|
|
|
Sakmie apie kūli
Senē, senē Lietovuos pašalie bōva tuoks suodžios. Tėn gīvena dėdlē duorė žmuonis. Anėi tėik gerā sorokovā, ka ė pats biesos anīms tuo sotarėma pavīdiejė. Jēgo kaimė kas kielė pariedka, toukārt vėsė linksmėnuos. Vo jē bova bodīnė – vėsė nabāštėka i kapelius līdiejė. Ė nauduojies vėsa suoda vėina šōlėnė. Soēs vondėns pasėsėmtė ė aple vārgus, ė aple linksmomus pasėrokous. Nikumet nasėpīka, nabaries, vėins kėtām prāsta nalinkiejė. Tiktā geromo, tiktā pagālba atsėdiekavuojė. Ė apsėgivena šalėp biesos. Tas biesos somėslėjė tus žmuogelius sokėršīntė. Paiemė veina nākti ont tuos šōlėnės ė ōžrėtėna dėdliausi kūli. Atēn rītmetie sēnas buobēlės, veiz – vēlnėšks kūlis ontrėtīnts ōnt tuos šōlėnės. Atēn jāunas muotrėškēlės so vakūtelēs – nagāl vōndėns pasėsėmtė. Ašaruo vėsė, bet vėins kėta nakāltėn, nābaras. Tiktā vėsė dejou. Ė ėšgėrda tas aimanas dēivė Vondēnė. Ana pamėslėjė – aš tuo vēlnėška kūlė naparėtinsio, geriau taprāded iš puo kūlė tekietė šaltėnis. Tiktā tēp pamėslėjė, tēp ė atsėtėka. Ė dabā tabie tas vēlnėšks kūlis, ė vadēnas ōns „Aukora kūlis“, ė iš po tuo kūlė tābtēk dėdlē skāidros šaltėnis. Tabie ė tas suodžios, ė vadėnas ōns „Senuojė Impėltis“, i katrou ė kvėitām atvažioutė.
RUPŠAS Bronius
Piliakalnis
|
|
